ياالله عسى الجنة جزى والديني

[ياللي ورى ركنك تلوذ المساكين واسجد لمرضاتك واذلل جبيني
عبدك على عهدك ومدك بلا حين وانا على بابك وتعلم كنيني
ازريت لا اعدل كفوف الموازين وازريت اسد الربع من عشر ديني
لبيه ثم لبيه لبيه واهلين يا اعز وجهين ثمرها سنيني
وابر واغلى من تحلت به العين وأجل وابرك من اجيه ويجيني
واهلا ولو اهلا توقف مع اسمين وقفتها ما بين الاسمى وبيني
واثنين ما افرق فالغلا ومتساوين الا اني افرق بين عيني وعيني
ليت انهم فالصدر حرز عن البين والموت قبل يمرهم يحتويني
وعن واهج الرمضا ضلوعي بساتين واليا وطوها زلهم راحتيني
اطيب وامرض واغضب العمر وازين وانصى المجافي واجفي اللي يبيني
واحب واكره واحشم انسان وأهين في ذاتهم واقرب بهم مبعديني
وآصل على رجوى رضاهم للاقصين واقطع بمبعدهم ولو هو يميني
ولو ان عمري يصرف ايام وسنين قسمت عمري عدل مع غالييني
واليا نزلت اقبل كفوفهم لين ساويت راسي مطلع الفرق ايديني
وانا فدى ماطى قدم رجل الأثنين من دون اقول اللي تحوشه يديني
وآمين من جودك ومن جودك آمين يالله عسى الجنه جزى والديني.....
عطوني رآيكم بشعرولد قبيلة عتيبه الشاعر خالد الدعجاني العتيبي
وتقبلوا تحياتي.....